كلمات تعبر عن حياتي

النسر الصامت · 03.07.2014

انا ليلة البارح تزاعلت انا والنوم
رسمت اسعد الاحلام والنوم علقها

تكدر منامي والهواجيس كوم وكوم
هموم الزمان اركت علي مطارقها

من الضيق كن الجو منه الهواء معدوم
اجر النفس كني من الضيق سارقها

عسى ما جرا تكفير ذنبا عن المهموم
عساها طهور النفس قدام خالقها

الا يا اشقر الجنحان ياللي كسرت الحوم
تمنيت لي مثلك جناحين واطلقها

ابي كل ما ضاقت مثل ليلتي واليوم
اخلي همومي في زماني وفارقها

الا يا حبيبي كل شي حصل مقسوم
مقادير مجريها وليه ورازقها

وانا حظي اللي ساقني سوقة المهزوم
على ديرة ما جمل الليل بارقها

تطول المسافه كل ما قرب المفهوم
تباعد مغارب ديرته عن مشارقها

وانا يا طرالي صاحب خاطره مكلوم
تشوف المدامع دمعها اليوم مغرقها

حبيب شرى قلبي ولا كسرن بالسوم
وانا مهجتي من دمعة العين حارقها

حبيبي كفايه صمت لا تجرح المهموم
انا منتظر كلمة من شفاك تنطقها